《孟婆湯》
我係一個孟婆，工作就係為死去靈魂提供一碗孟婆湯，等靈魂以空白投入另一段生命。
呢份工作好簡單，我只係需要介紹，然後提供，而我最常遇到既問題就係：我可唔可以唔飲？
其實……係可以，因為呢個係可選既項目，從來無規定一定要飲，只係，我會同唔想飲既人講清楚佢將會面對既風險。
投胎要排隊，你可能要等一年，十年，二十年，甚至一百年，唔想飲，你一定係有你想記住既人或者事，係咪？但當你投胎之後，呢個人，呢件事，你仲會唔會見到。
先唔講年份，當你剛出世時，你需要經歷連活動都有困難既時期，你需要依靠父母照顧，用戶回饋過，因為你發育未健全，你連自己大小二便都控制唔到，想講野都唔知點講，更重要係，你如果一出世就講野只會令你父母覺得好奇怪，我就勸你諗諗佢先。
其次，出生地方都有唔同，如果你同原本生活地相隔好遠，你要用幾多年時間先可以去搵返你想搵既人？
再退一萬步講，當你搵到，人地又認唔認到你？你係一個完全陌生既人，唔緊要，當佢信你，但你要知道你需要面對既係，佢會先一步離你而去。
前世係前世，下世係下世，如果你帶住前世既記憶，所有野都會有比較，你會比較你以前父母同現時父母，無論邊一個好，都係一場悲劇。
唔單止係比較，你所有食過玩過體驗過既記憶，都會令你下一世失去『第一次』既體驗，無論你初戀同初吻都好，都唔再係第一次。
你確定想為左前一世所思所想既野，去完全犧牲你下一世既幸福嗎？
係數唔到幾多年之前，其實係無孟婆湯，因為當時既人再受唔到呢種永遠既回憶先至發明出呢碗湯，希望可以重新開始。
但我可以私人比個建議你，呢碗湯，你可以唔飲晒，飲少每一滴，你都可以留低殘餘既記憶，咁一定唔太清楚既，但如果你遇上你想見既人同事，你會覺得特別有親切感，你會有少量既記憶湧返出黎，覺得呢個人好投緣，好熟悉，而呢個做法，幾乎9成以上既靈魂都會咁做。
當然，如果你睇得開，你可以完全飲晒，有時候，忘記，比起記得更好。
忘記，先可以重新出發，先可以享受下一世既一切，先可以感受不一樣的生命。
我係孟婆，工作係提供一碗孟婆湯，飲唔飲，係你決定。
一切都是關於死後的故事。
Search